Последна вест од Париз: ПСЖ ја одреди цената за Мбапе, на потег е Флорентино

Бразилецот Леонардо вчера дополнително ја распламна трансфер сагата наречена „Килијан Мбапе“, откако главниот оперативец на ПСЖ призна дека младата ѕвезда посакува заминување во Реал Мадрид, но не пропушти и да го искритикува „кралскиот клуб“.

Леонардо обвини дека Реал некоректно се однесува во изминатите две години и е во постојан контакт со играчот без притоа да преговара со ПСЖ, па откако првата понуда вредна 160 милиони евра и дефинитивно била одбиена, луѓето од Париз чекаат нов напад од „кралевите“.

Флорентино Перез е навистина загреан за францускиот репрезентативец и подготвен е да издвои цело богатство на неполна година пред истекот на неговиот договор, а последната информација која пристигнува од Париз е поврзана за сумата која сигурно ќе ги натера водечките луѓе на ПСЖ да му ја отворат вратата на својот фудбалер.

Во 2017-та година, ПСЖ исплати 180 милиони евра во касата на Монако и ќе мора да врати 35 милиони евра на клубот од „кнежевството“ доколку до крајот на летниот преоден рок го продаде Мбапе, па поради тоа, веќе е одредена реалната цена за која ќе се согласат на трансфер.

Угледниот париски весник „Ле Паризен“ потенцира дека шеиците од Катар, Ал Келаифи и Леонардо ја одредиле пазарната вредност на Мбапе на 220 милиони евра, па сега на потег е Флорентино Перез како главен претставник на најтрофејниот клуб во Европа.