Смит: Ќе ја „исплескаме“ Звезда пред нашите навивачи

Партизан доживеа порази во двата натпревари со Црвена Звезда во финалето на АБА лигата и се наоѓа во тешка ситуација во оваа серија која се игра во три добиени.

Следниот натпревар е да се биде или не за „црно-белите“, меч на кој пораз ќе значи губење на титулата во регионалното натпреварување. Меѓутоа во таборот на Партизан се убедени дека ситуацијата ќе биде сосема поинаква пред нивните навивачи, а најискрен, најотворен беше бекот, Џејлен Смит.

-За нас ќе биде како Евролига. Ќе биде тензично, знам дека навивачите ќе ни дадат голема поддршка, спремни сме да си одиме дома и да им ги исплескаме задниците пред нашите поддржувачи. Одиме дома, да ги добиеме двата натпревари. Тоа е единственото нешто што можеме да го направиме. За почеток, ајде да го добиеме третиот меч, -порача Американецот кој има и хрватски пасош.

-Имавме добри шанси за брејк во двата натпревари. Се случија работи кои ни го срушија ритамот и сега си одиме дома со минус од две победи. Ајде да одиме дома, да се обидеме да го решиме ова, -додаде Смит кој добро ги искористи минутите дадени од тренерот Жељко Обрадовиќ.

Третиот дуел е закажан за в недела, а ако се потребни останатите натпревари ќе се играат на 21 и 25 мај.