Пике за новата ситуација во Барселона: Дајте му време на Лапорта…

Барселона ќе ја заврши оваа сезона без ниту еден освоен трофеј, но во овој момент изгледа дека тоа е најмал проблем затоа што настана „конфликт“ меѓу првиот човек на клубот Барселона и тренерот Чави Ернандес и според информациите стратегот е на излезна врата од шпанскиот великан.

Само до пред некое време Лапорта и неговите соработници го убедуваа Чави да остане во клубот, да ја смени одлуката за заминување на крајот на кампања, нешто што навистина се случи, поточно легендата потврди дека ќе го исполни договорот кој е со важност до 2025 година.

Сега Лапорта и неговиот тим од управата се свртеа за 360 степени и по една искрена изјава на стратегот за ситуацијата во клубот тие сакаат да се ослободат од него.

Како ќе заврши оваа ситуација набрзо ќе дознаеме, а во меѓувреме Жерард Пике побара трпение од членовите, навивачите на Барселона кога е во прашање Лапорта кој не блеска во својот втор мандат како што се очекуваше и самиот најавуваше.

-Лапорта многумина го сметаат за најдобриот претседател во историјата на клубот. Резултатите не се сè. Членовите имаат среќа што можат да гласаат за претседател. Би му дал време додека не му заврши мандатот. Мора да бидеме одговорни за она за што гласаме, -вели Пике кој смета дека играчите би се прилагодиле ако Чави добие отказ.

-Играчите знаат дека се во клуб во кој работите можат да се променат, а доколку се смени тренерот, ќе се прилагодат и ќе имаат надеж дека ќе сакаат да му се допаднат на новиот тренер, -смета поранешниот шпански репрезентативец.