Филаделфија го декласираше Канзас Сити во Супербоул спектаклот, МВП титулата за Хартс

Филаделфија Иглси се нови шампиони во НФЛ лигата, откако рано утрово во 59-то Супербоул финале едноставно го декласираа досегашниот шампион, екипата на Канзас Сити.

Популарните Чифси имаа можност да прераснат во династија со трета последователна титула во финалињата, но мора да се признае дека Махомс и неговите соиграчи во ниту еден момент не беа блиску до такво нешто.

Иглси на фуриозен начин го започнаа финалето и по првото полувреме имаа предност од 24:0, по што веќе почна да станува јасно дека американскиот фудбал ќе добие нов шампион.

Канзас Сити во третиот период го имаше првиот тачдаун, но откако и овој период им припадна на играчите на Филаделфија со 10:7, стана јасно дека веќе нема шанси за пресврт.

На крајот, натпреварот заврши 40:22 во корист на новиот НФЛ шампион, а сосема оправдано, за МВП во Њу Орлеанс беше избран Џејлен Хартс.