Србија најде решение за големиот ривал Хрватска и освои трето олимписко злато по ред на ОИ

Српската ватерполо репрезентација го победи големиот ривал Хрватска (13:11) во финалето на олимпискиот турнир и стигна до највисокото место на победничкиот пиедестал во Париз.

Големото балканско дерби дојде откако двете селекции беа четврти во своите групи, но успеаја да ги надиграат ривалите во четвртфиналето, односно полуфиналето, а Србите уште од почетокот најавија дека се порасположени и поблиску до златните медали.

Првата четвртина заврши со резултат 5:2 во корист на нашиот северен сосед, следуваа две израмнети четвртини во кои Србите не дозволија намалување на негативата, а на Хрватите тоа само симболично им успеа во последниот период кој го добија со 3:2 за конечни 13:11.

Србите триумфираат третпат по ред на олимписките турнири, нешто што досега и успеало уште само на репрезентацијата на Унгарија.

Претходно, во битката за бронзените медали, Американците ја совладаа Унгарија по подобро изведување петерци.