Ѓуретановиќ постави нов македонски рекорд на 400 метри слободен стил

Македонскиот пливач Никола Ѓуретановиќ собори национален рекорд на Светското првенство во мали базени и тоа во дисциплината 400 метри слободен стил.

17-годишниот пливач кој годинава настапи и на Олимписките игри во Париз, ја препливал делницата од 400 метри за 3:53.05 минути, со што успеа да го собори рекордот на Марко Блажевски за дури три секунди.

Истовремено, овој резултат е и за девет секунди подобро време од тоа со кое Ѓуретановиќ бил пријавен за настап на СП во Будимпешта, Унгарија.

Во генералниот пласман, тинејџерот го освоил 40. место од 49 пливачи во оваа дисциплина.

Златниот медал на 400 метри слободен стил го освои Австралиецот Илајџа Винингтон со време 3:35.89.