Меси има поголема плата од вкупниот буџет на речиси цела МЛС

Лионел Меси очекувано е најплатен фудбалер во МЛС и ќе заработи 20,45 милиони американски долари за настапите во редовите на Интер Мајами.

Аргентинецот ќе ги добие овие пари како гарантирана заработка од својот клуб, но проценките се дека заедно со останатите спонзорски договори на лигата и клубот, ќе дојде до заработка од околу 150 милиони долари за трите договорени години во тимот од Флорида.

Лоренцо Инсиње е на второто место според платата и добива 15,44 милиони долари од Торонто, додека соиграчот на Меси, Серхио Бускетс е далеку зад него со загарантирана компензација од 8,77 милиони долари.

Вкупната гарантирана компензација на Интер Мајами изнесува над 41 милиони долари, што не само што е рекорд во МЛС за една сезона, туку е и двојно поголема од речиси сите останати клубови во ова американско натпреварување.

Зад Интер Мајами, следуваат Торонто со вкупна сума за плати од 31,4 милиони долари и Чикаго со 25,13 милиони долари. Поединечно, забележан е раст од 4,8 проценти на платата за фудбалерите, а 115 ќе заработат најмалку 1 милион долари.
Ако се спореди платата на Меси и вкупната сума за плати на клубовите, само четири клуба имаат вкупна сума за плати поголема од заработката на Аргентинецот.