„Лавиците“ го дознаа ривалот за четвртфиналето во Европскиот Куп

Најдобрата македонска женска ракометна екипа, Ѓорче Петров го дозна ривалот за четвртфиналната рунда во Европскиот Куп.

Избраничките на Симе Симовски на денешната ждрепка во Келн добија шпански предизвик и тоа во името на составот на Елче. Тоа е тим кој во осминафиналето ја елиминираше португалска Мадеира со вкупни 59:49, а претходно беше подобар од ИБВ од Исланд со 69:42.

Елче се наоѓа на третата позиција во првата шпанска лига со учинок 11-3 што договолно говори дека пред „лавиците“ е сериозен тест во оваа фаза на натпреварувањето.

Ако клубот од Ѓорче Петров ја мине оваа пречка тогаш во полуфиналето оди на победникот од пресметката Гран Канарија и Гранољерс (шпански двобој).

Натпреварите од четвртфиналето ќе се играат на 9/10 март, односно 16/17 март.