Руските и белоруските олимпијци нема да учествуваат на церемонијата на отворање на ЛОИ во Париз

Интернационалниот олимписки комитет денеска донел одлука според која претставниците на Русија и Белорусија на претстојната Олимпијада во Париз нема да учествуваат на церемонијата на отворање која вообичаено предизвикува големо внимание кај светската јавност.

Претходно, ИОК им овозможи на руските и белоруските спортисти да учествуваат на ЛОИ годинава, но како неутрални спортисти, што значи дека нема да користат знаме, амблем и химна на својата земја. Комитетот одобри специјално заедничко знаме на кое пишува дека се однесува на неутрални спортисти, како и химна без текст која би била интонирана на победничките пиедестали.

Досега се пријавени 12 руски и 7 белоруски спортисти за учество во Париз, а ИОК потврди дека ќе им овозможи на одреден начин да ја почувствуваат магијата на церемонијата, но тие нема да бидат претставени како спортистите од другите земји.

Во меѓувреме, Русија најави дека планира да организира „Игри на пријателство“ на своја територија, како обид да им овозможи на голем број спортисти да се натпреваруваат без никакви ограничувања. Првото издание на вакво натпреварување е одржано во 1984 година, кога Русија покани осум нации, а истовремено ги бојкотираше ЛОИ во Лос Анџелес.

ИОК дополнително ќе одлучи каков ќе биде статусот на Русите и Белорусите на церемонијата со која ќе се затворат ЛОИ во Париз.