Промена во последен момент: Белингам во составот, друга ѕвезда на Реал отпадна за дуелот со Сосиедад

Џуд Белингам вчера не беше вклучен во составот со кој Реал Мадрид го најави патувањето во Сан Себастијан, но денеска се случи промена и англискиот репрезентативец сепак ќе биде со својата екипа.

Актуелниот лидер во Ла Лига има тешко гостување кај Реал Сосиедад, а Белингам требаше да одмори поради стомачни проблеми кои го измачувале последните неколку дена.

Џуд не се појави на вчерашниот список, но денеска има промена и тој ќе го замени Родриго, кој пак во меѓувреме се разболел и нема да патува за ова гостување.

Очекувањата се дека Белингам нема да биде стартер против Сосиедад, бидејќи екипата и тренерот Карло Анчелоти сега се фокусираат на дуелот со Баерн Минхен во Лигата на шампионите.

Родриго имал симптоми на грип, па затоа е поштеден од патувањето и веројатно ќе биде подготвен за следниот предизвик на Реал.