Бекам крои план за ангажман на подзаборавената ѕвезда во Серија А

Проектот на Дејвид Бекам во Интер Мајами не дочека старт каков што се очекуваше поради хаосот кој го предизвика коронавирусот, но легендарниот Англичанец очигледно го користи овој сушен период за да крои нови планови за иднината.

Бекси не крие дека сака да привлече неколку ѕвезди од европскиот фудбал и не исклучува трансфери на звучни имиња кои се докажани на стариот континент, а последен во низата се најде Хавиер Пасторе.

Подзаборавената аргентинска ѕвезда доста лошо се снајде во Рома и враќањето во Серија А не се покажа како полн погодок за него, а како што пренесува „Футмеркато“, Бекам сака да го искористи сето ова и да го доведе 31-годишниот играч за врска во неговата МЛС франшиза.

Рома сигурно нема да се противи на вакво нешто бидејќи неговата плата е една од највисоките во првиот тим, а очекувањата се дека и трансферот нема да биде прескап за Бекам, со оглед на тоа што Рома ќе мора да бара многу помалку од сумата за која го купи од ПСЖ пред две години (24 милиони евра).

Пасторе е дел од фудбалска Европа од 2009-та година кога пристигна во Палермо, па сериозниот интерес од Бекам, за него може да значи крај на авантурата на стариот континент.