Алонсо се огласи за заминувањето на Клоп, па доби прашање за можна преселба на „Енфилд Роуд“

Јирген Клоп денеска самостојно соопшти дека си заминува од Ливерпул по крајот на оваа сезона, па англиските медиуми и букмејкерите почнаа да даваат прогнози за тренерите кои можат да го наследат извонредниот германски стручњак.

После девет години во Ливерпул, Клоп реши дека е време да се повлече и да му остави простор на помлад колега, а многумина сметаат дека тоа може да биде поранешниот играч за врска на „црвените“.

Чаби Алонсо врши неверојатна работа во Баер Леверкузен и се бори за историска титула во Бундеслигата, но денеска не можеше да ги избегне прашањата поврзани за негова преселба на „Енфилд“.

– Свесен сум дека има шпекулации за мене и тоа е нормално. Можам да кажам дека сум фокусиран само на Леверкузен. Среќен сум тука, со сите мои играчи и клубот.

– Заминувањето на Клоп е големо изненадување за сите. Јас имам голема почит кон него за работата која ја врши и за тоа што го оствари во Ливерпул. Дали можам да бидам следниот менаџер на Ливерпул? Во моментов не можам да дадам директен одговор за тоа. Среќен сум тука и мислам само на Леверкузен, – изјави Чаби Алонсо.