Шмајхел за пресвртот во кариерата на Мегваер: Никогаш не закрепна по тој инцидент

Хари Мегваер одамна не е во прв план во редовите на Манчестер Јунајтед, а неговите ретки настапи постојано носат по некоја нова грешка, а со тоа и критики, па и навреди од навивачите.

Дефанзивецот е под постојан притисок, во меѓувреме ја загуби и капитенската лента во Јунајтед, а легендата на овој клуб, Петер Шмајхел се обидел да ја лоцира причината за пресвртот во кариерата на Мегваер.

– Го следам Мегваер внимателно уште откако настапуваше со мојот син во Лестер и секогаш сметав дека има материјал да биде фудбалер на Манчестер Јунајтед.

– Не сум отстапил од тој став, но мислам дека проблемот кој му се случи на еден одмор во Грција направи пресврт во неговиот живот.

– Сметам дека во тие моменти за него не се водеше доволно грижа и наместо да добие професионална помош и внимателен пристап, тој беше „фрлен во оган“. Како никогаш да не го надмина тоа што му се случи во приватниот живот на тој одмор, – истакнал Шмајхел.

Мегваер беше уапсен од грчката полиција на островот Миконос во 2020 година, под обвинение дека учествувал во физички напад, давање отпор и напад на припадници на полицијата и обид за поткуп, а во отсуство е осуден на условна казна од 21 месец и 10 дена. Фудбалерот во изјавите за британските медиуми истакна дека доживеал голем стрес и на моменти се плашел за својот живот.