„Навредениот“ Мело откри уште еден инцидент во кој удрил играч во Серија А

Фелипе Мело беше навреден од извадокот од автобиографската книга на Џорџо Кјелини, во која неговиот поранешен соиграч го опиша како „расипано јаболко кое секогаш предизвикува инцидент“, но со своите последни изјави како да го оправдува ставот на дефанзивецот на Јувентус.

Најпрвин Мело откри дека го удрил со глава Кјелини и затоа тој му е лут и пишува такви работи за него, за денеска самиот да открие дека своевремено го удрил и актуелниот тренер на Бреша, Диего Лопез.

– Се сеќавам на натпреварот со Кајлари, на кој Лопез сериозно го удри во лицето мојот соиграч Џилардино. Имав дуел со него и тој ме навредуваше мене и мојата новородена ќерка.

– Го добивме натпреварот во последната минута, а по завршувањето на средбата завршивме лице в лице со Лопез и не му дадов време ни да каже нешто пред да го удрам, – истакнал Мело објаснувајќи го периодот кога настапуваше за Фиорентина.