Холанѓаните подолго ќе играат без публика

Спортските настани во Холандија ќе се играат без публика се додека не биде пронајдена и дистрибуирана вакцина за коронавирусот.

Ова е денешната одлука на холандската влада која ги изненади спортските работници во земјата, бидејќи тоа е најава дека уште долго нема да има гледачи на трибините, со оглед на очекувањата дека вакцината би била достапна најрано на почетокот на следната година.

Сезоната во Холандија веќе е прекината без да биде прогласен шампион бидејќи властите забранија спортски настани до 1. септември, но најновата одлука значи големи загуби и за следната сезона, бидејќи пред се фудбалските клубови нема да можат да генерираат приходи од продадени билети.

Фудбалската федерација истакна дека е непријатно изненадена од ваквиот став и ги најави загубите за спортот и клубовите.