„Кориере дела Сера“ тврди дека Лацио го прекршил тренинг правилото

Лацио посакува да ја продолжи сезоната во Серија А на начин на која го заврши претходниот дел, но „Кориере дела Сера“ тврди дека Симоне Инѕаги и неговите фудбалери ја прекршиле забраната за колективент тренинг.

Според официјално утврдените мерки од италијанската влада, клубовите смеат да одржуваат колективни тренинзи од 18 мај, но новинарот на споменатиот медиум тврди дека денешниот утрински тренинг на кој учествувале шест фудбалери, завршил со петминутно соочување „три на три“.

Оваа информација предизвика многу контроверзи во Италија бидејќи би значела директно прекршување на мерките кои мора сите да ги почитуваат, а „Кориере дела Сера“ потенцира дека овој тренинг се одржал на помошен терен на кој екипата е поизолирана од случајните минувачи.

Клубот засега не реагираше со демант, но изјава дојде од првиот човек на медицинскиот тим, Иво Пучини.

– Ја прочитав веста и фотографијата која е употребена е стара. Од клубот ме уверија дека информацијата не е точна, во спротивно ќе поднесам оставка на функцијата. Мора да преземам одговорност доколку тие што треба не ги следат моите препораки, – истакнал Пучини.