Клоп му испрати искрен совет на Џерард откако заработи отказ во Астон Вила

Последниот пораз на Астон Вила од Фулам резултираше со отказ за Стивен Џерард и легендата на Ливерпул остана без работа, па сосема очекувано, јавноста брзо заборави на неговата успешна етапа во Ренџерс и денеска во фокусот е неговата очајна статистика во Бирмингем.

Стиви Џи победи само на 12 од 39-те натпревари како менаџер на Астон Вила и не го преживеа ултиматумот кој му го постави раководството пред мечот со Фулам, а кој гласеше дека мора да победи на следните два меча во Премиер лигата.

Џерард не ја дочека втората шанса против Брентфорд претстојниот викенд и вчера на полноќ доби експресен отказ од водечките луѓе, но ако медиумите се занимаваат со неговите лоши бројки, има и такви кои му даваат поддршка на Џерард.

Еден од нив е Јирген Клоп, кој во улога на ментор и доста поискусен во тренерската работа му порача на Стиви Џи да направи мала пауза од фудбалот и да одмори пред следниот предизвик кој сигурно ќе го добие.

– Сигурен сум дека тој ќе се врати во фудбалот и ќе се врати за добро. Го следам од самиот старт на неговата тренерска кариера и имав разговор со него ова утро. Не беше ништо длабоко и долго, но имав разговор со него. Свесен сум дека ова е разочарувачки за него поради амбициите кои ги имаше, но нема потреба да се грижиме за Стиви.

– Тој добро ја познава оваа игра и знаат како одат работите, знае дека може да дојде до ова. Во животот добивате многу удари, најважно е како ќе одговорите. Тој секогаш се враќам и ќе се врати и од ова. Сите тренери учиме од ваквите работи и потоа наоѓаме подобри места. Тој ќе се врати, но пред да го направи тоа, мој совет е да одмори и да си даде време. Тој непрестано работи откако престана да игра фудбал и мислам дека треба да одмори и да ги наполни батериите пред следниот предизвик, – вели Клоп.