МЗТ со нова победа над ТФТ до експресен пласман во финалето

Кошаркарите на МЗТ Скопје Аеродром се први финалисти во македонскиот кошаркарски плејоф, а до таков статус дојдоа по денешната трета победа во полуфинална серија со ТФТ (58:72).

По две победи на домашен терен, актуелниот шампион успеа да го обезбеди и потребниот брејк и со максимални 3:0 да го затвори полуфиналето, по што сега ќе го чека противникот во финалето.

МЗТ уште на полувреме имаше 12 поени предност и најави дека е дојден по победа во „Кале“, а го дотолчи противникот во третиот период кој заврши со резултат 39:60.

До крајот гостите рутински ја заверија победата со конечни 58:72 и ги израдуваа своите фанови со потврдениот експресен пласман во финалната серија.

Баковиќ со 14 поени беше најефикасен во победничкиот тим, а по 10 поени реализираа браќата Стојановски и Делалиќ. МЗТ во финалето ќе ја брани титулата во дуел со подобриот од соочувањето на Пелистер и Работнички.