Матуес за враќањето на Хумелс во националниот тим: Секој треба да си го знае местото

Новиот германски селектор Јулијан Нагелсман првпат направи избор на фудбалери кои ќе треба да настапуваат за националниот тим, а на него се најдоа и ветераните Матс Хумелс и Томас Милер.

За Хумелс тоа е враќање во репрезентацијата по подолго време, а потегот на Нагелсман отвори и дебата во јавноста, во која очекувано се вклучи и легендарниот Лотар Матеус.

Матеус го поддржа изборот на Нагелсман за наследник на Ханси Флик, а смета и дека одлуката за Хумелс е исправна.

– Важно е како игра, а не неговите години, затоа и се согласувам Хумелс да се врати во националниот тим.

– За селекторот секогаш е добро да има околу себе искусни играчи, кои повеќе ќе размислуваат да преземат одговорност кога е потребно и да му помогнат, отколку да се прават паметни во медиумите.

– Она што е најважно за Нагелсман е да биде отворен со играчите и јасно да им навести зошто му се потребни и кога би сметал на нив. Не смее да се случи подоцна некој да се жали затоа што немал минутажа или одиграл само неколку минути.

– Знаеме колку се важни Хумелс и Милер за нивните тимови, а Милер одлично ја прифати новата ситуација во Баерн. Сигурно знае дека Мусиала веќе има предност во однос на него, а истото ќе биде и во случајот со Хумелс.