Првиот човек на Фенербахче го потврди трансферот за кој зборува цела Шпанија: Арда не сакаше да остане со нас

Фенербахче и Барселона практично си имаа подадено рака за Арда Ѓулер и „турскиот Меси“ требаше да мине уште една сезона во родната земја пред да пристигне на „Камп Ноу“, но во последните 48 часа дојде до голем пресврт, а причина за тоа е понудата која пристигна од шпанската престолнина и желбата на самиот тинејџер.

Арда одбил да игра уште една сезона во Фенербахче и решил веднаш да си замине од овој клуб, па според најавите, негов следен клуб ќе биде Реал Мадрид кој ја искористи својата финансиска моќ за да ја престигне Барселона и да и го „украде“ договорениот трансфер.

Ѓулер има само 18 години и ќе биде ангажиран за првиот тим на Реал Мадрид, а последните информации од Шпанија велат дека трансферот ќе изнесува 20 милони евра.

Потврда за истиот пристигна и од Турција, или поточно од првиот човек на Фенербахче, Али Коч.

– Единствено што можам да кажам е дека Арда си оди од Фенербахче, тоа е сигурно. Арда не сака да остане тука и неговиот трансфер ќе се реализира во наредните неколку часа, или денови. Сега ги прецизираме последните детали за трансферот.

– Добивме понуди според кои тој уште една сезона ќе останеше во Фенербахче за вистински развој, но тој не сакаше да остане со нас. Арда си оди и ќе дадам објаснување за се откако ќе се комплетира целиот трансфер. Нема да додадам ништо повеќе, ќе зборувам повеќе за ова во иднина, – изјавил Али Коч.