Николов: Ќе се обидиме да им вратиме на Шпанците за поразот во полуфиналето на ЕП

Најдобрата македонска кошаркарска репрезентација се соочува со Шпанија на отварањето на квалификацискиот циклус за Светското првенство кое е на програмата во 2023 година.

Првиот предизвик за избраниците на Бајиќ е навистина голем, битка против актуелниот светски првак кој на хартија е апсолутен фаворит на дуелот кој утре од 19:30 часот се игра во СЦ „Јане Сандански“. Нашите репрезентативци го почитуваа ривалот, но во исто време најавуваат максимална борба, залагање во обидот да се шокира „црвената фурија“ во Скопје.

-Не чувствуваме никаков притисок, тоа е најважно за нас. Играме против Шпанија. Ќе дадеме сè од себе да дојдеме до позитивен резултат за нас. Следниот меч ни е со Украина, потоа и Грузија. Таму ги гледаме шансите и се надевам дека ќе бележиме позитивни резултати. Репрезентацијата е предизвик за секој од нас, а враќањето на Дамјан Стојановски е голем плус.

-Ние сите што сме овде ќе се бориме да имаме добри резултати и да носиме успеси. Се надевам дека ќе дојде и публиката да ни даде поддршка. А ние, ако ни се укаже било каква шанса, ќе се обидеме да им вратиме за оној пораз во полуфиналето од Европското првенство од пред десет години, -вели плејмејкерот Кристијан Николов.