Лацио сака да го „врати“ играчот за кој Лотито јавно се пофали, Јувентус бара почитување на договорот

Лацио во последниот летен преоден рок донесе неколку засилувања, а претседателот Клаудио Лотито посебно се пофали со ангажманот на Николо Ровела од Јувентус.

Играчот за врска дојде на заем на две години, со задолжителна обврска за откупување на договорот за најмалку 17 милиони евра, а Лотито еуфорично истакна дека Лацио дошол во ситуација да купува фудбалери на Јувентус, нешто што во минатото вообичаено се одвивало во спротивен правец.

Ровела добро соработуваше со Маурицио Сари на чие барање и бил доведен, но по падот на формата следуваше и отказ за Сари, а новиот тренер Игор Тудор не смета сериозно на потенцијалниот италијански репрезентативец.

Италијанските медиуми тврдат дека Лацио сега се обидува да искомуницира со Јувентус за прекинување на заемот и редефинирање на договорот, но втората страна не е заинтересирана за никаков компромис.

„Бјанконерите“ веќе ја очекуваат заработката од фудбалерот кој претходно го купија од Џенова и ќе бараат почитување на договореното од страна на римскиот ривал.