Куман: Ништо не е невозможно за Барселона, ама мора…

Барселона утре му гостува на Пари Сен Жермен во реваншот од осминафиналето на Лигата на шампионите, средба која каталонците ќе ја започнат со негатива од 4-1.

Токму тој резултат од „Камп Ноу“ за многумина значи дека реваншот ќе биде формалност, односно пред Барселона е невозможна мисија за пласман во четвртфиналето на елитното натпреварување. Меѓутоа шпанскиот вицешампион нема намера со бело знама да излезе на „Паркот на принцовите“ и според тренерот Роналд Куман ќе се обиде да направи чудо под услов неговите момци да бидат максимално расположени и ги искористат шансите кои ќе ги имаат на теренот.

-Ништо не е невозможно. Ние веруваме во себе. Знаеме дека во Барса мора да победуваш и ќе го покажеме овој менталитет што го демонстриравме подолго време. Ништо не е невозможно. Мора да бидеме ефикасни во играта за да имаме опции.

-Ова е комплицирано. ПСЖ е силен и се стреми да ја освои Лигата на шампионите. За да имате опција да се вратите, мора да играте многу ефикасно. Ќе се обидеме. Ние секогаш излегуваме да победиме и се надеваме дека можеме да се обидеме тоа да го направиме. Ќе биде многу тешко. Играме против тим како ПСЖ кој нема да ни дозволи многу да играме, -рече Холанѓанецот.