„Комити“ им се заканија на Арсовска и Славевски: Ако не постапите во рок од 48 часа, следи радикализација! (Фото)

Вардар оствари важна дерби победа над Работнички изминатиов викенд и ја прекина губитничката серија во домашното првенство, но како по обичај во последно време, проблемите не завршуваат со еден поволен резултат.

„Комити“ водат тешка битка веќе година наназад и се обидуваат на секаков начин да придобијат средства за нормално функционирање на клубот, а голема неповолност е тоа што на клупската каса не пристигнуваат средства кои се ветени и загарантирани.

Поради тоа, најпознатата навивачка група во Македонија денеска испрати своевидна закана до градоначалничката на Скопје и претседателот на советот на Град Скопје, односно побараа најбрзо исплаќање на средствата кои му беа доделени на најтрофејниот македонски колектив.

– Упатуваме апел до претседателот на советот на Град Скопје, Трајко Славевски и градоначалничката Данела Арсовска, финансиските средства наменети за ФК Вардар, изгласани едногласно уште на 20.07.2023 да бидат доделени веднаш. Немате повеќе време за чекање!

– Вашата пасивност во однос на ФК Вардар и меѓусебното префрлање на одговорноста, се недозволиви. Никогаш нема да прифатиме, било кој да има таков однос кон клубот на народот. Затоа, упатуваме јасно барање – постапете веднаш! Доколку за 48 часа не постапите и не ја спроведете одлуката, најавуваме радикализација на борбата.

– Не дозволувајте да бидете запомнети како луѓе кои свесно или несвесно го саботирале клубот на народот. Не дозволувајте повторно да треба да се огласиме по однос на ова прашање.