Јовиќ: Ова не ни се случува првпат, квалитетни три четвртини не се доволни за победа во ЛШ

Екипата на Еурофарм Пелистер не успеа да дојде до бодови и во петтиот натпревар од групната фаза во Лигата на шампионите или поточно подобар од нив беше составот на Загреб кој славеше со 27:18.

Пелистер беше рамноправен ривал по првото полувреме (10-10), но по 40 минута екипата доживеа драстичен пад и на крајот претрпе и убедлив проаз од хрватскиот преставник.

-Бевме многу добри околу 43-45 минути, но потоа застанавме. Ова не ни се случува првпат и секако е нешто на што треба да работиме. Сигурно дека квалитетните три четвртини не се доволни за да се добие натпревар во Лигата на шампионите, -истакна тренерот Александар Јовиќ.

Свој коментар на натпреварот имаше и Петар Атанасијевиќ.

-Го држевме темпото до последните десет минути кога почнавме да грешиме и му дадовме шанса на Загреб да се одлепи и потоа немаше враќање. Без разлика на големиот пораз, морам да им честитам на соиграчите за добрата претстава, барем во тие 45 минути во кои бевме рамноправен противник на теренот, -порача нашиот репрезентативец.

Следниот ривал на битолчани во елитното натпреварување е полски Кјелце.