Ѓорческа остана без финале на „Триглав опен“ во Скопје

Македонската тенисерка, Лина Ѓорческа нема да игра во големото финале на ИТФ фјучерсот што се игра во нашата земја, поточно на терените на ТК Југ.

Ѓорческа во денешното полуфинале доживеа пораз од Ива Приморац од Хрватска со 2-0 во сетови. Два часа траеше надигрувањето на Лина и Ива, пресметка во која Хрватската подобро се снајде во клучните моменти и со 6-4 и 7-6 си обезбеди меч за титула на турнирот со вредност од 40.000 долари.

Кога ќе се погледне статистиката, двете тенисерки освоија по 80 поени, Македонката дури и имаше подобра реализација на брејк шансите (6/12 наспроти 7/17), ама тоа на крајот ништо не значи за нашиот најдобар рекет кој ќе мора да побара нова прилика за титула на некој од турнирите.

Приморац во завршниот дуел ќе игра против 14. носителка Дајана Радановиќ.