Солскјер: Денешниве фудбалери се како „снегулки“

Оле Гунар Солскјер во најновото интервју зборувал на повеќе теми, а неговото искуство во Манчестер Јунајтед му овозможува и да направи споредба на две различни генерации.

Норвежанецот е поранешен напаѓач на „црвените ѓаволи“, а во меѓувреме ја извршуваше и менаџерската позиција, при што имаше можност да соработува со најголем дел од актуелните ѕвезди на премиерлигашот.

– Моите соиграчи беа фантастични во соблекувалната. Кин беше лидер кого сите го слушаа, Дејвид Меј беше забавен, Невил секогаш беше најзафатен како и денеска. Рајан Гигс и Ники Бат беа забавувачи, беше тоа одлична соблекувална полна победници кои мразеа да губат.

– Некогаш и ќе се искаравме по некој лош натпревар, но тоа е исправно, мора малку тензија кога не ви оди најдобро.

– Ако денеска постапите така со актуелниве играчи, тие одат да плачат кај мама, тато, кај својот агент… како снегулки се. Не гледам многу фудбалери кои би преживеале во таа моја соблекувална, – истакнал Солскјер.