Лазаревски по триумфот над Швајцарија: Треба да имаме верба во оваа репрезентација

Специјален известувач за „Дерби“ од Берлин, Ристе Влахов

Македонската ракометна репрезентација ја победи Швајцарија за позитивен крај на настапот на Европското првенство, а избраниците на Кире Лазаров заслужено го надиграа третиот противник во групата за трета позиција на конечната табела.

Милан Лазаревски е меѓу ракометарите кои добија многу важно искуство со настапот на ЕП во Германија, а уште еднаш порача дека навивачите треба да имаат верба во оваа генерација на нашиот национален тим.

– Честитки до сите ракометари, одигравме фантастично, иако имавме и падови во текот на натпреварот.

– Дојде до израз психичката стабилност за која мислам дека ја поседуваме, мислам дека се потврди мојата изјава од пред некој ден дека оваа репрезентација има квалитет и треба да имаме верба во неа.

– Времето ќе покаже, но јас сум позитивен и очекувам многу подобри резултати во иднина, – изјави Лазаревски.