Ѓорческа немаше решение за првата носителка во Копер

Лина Ѓорческа го заврши настапот на Фјучрсот во Копер, по денешниот пораз од Французинката Кло Паке.

Најдобрата македонска тенисерка немаше среќа во ждребот и во осминафиналето налета на првата носителка на турнирот со награден фонд од 60.000 долари, па иако добро парираше во голем дел од мечот, не успеа да ја елиминира фаворитката.

Паке прва направи брејк и поведе со 3:0, но Ѓорческа возврати на ист начин и стигна до израмнување, за подоцна Французинката сепак да го повтори својот претходен ефект и да го добие првиот сет со 6:3.

Во вториот сет Ѓорческа дозволи брејк уште во првиот гејм, а противничката ја одржуваше предноста до деветтиот гејм, во кој направи уште еден брејк за конечни 6:3 и 6:3, односно 2:0 во сетови.

Паке игра во одлична форма периодов и се најде на 101 место на ВТА ранкингот, додека нашата Ѓорческа е на 285 место.