Гарсија за измената на Елмас на дербито со Милан: Тоа не е казна за фудбалерите

Наполи утре ќе гостува кај Салернитана и влегува како голем фаворит во дуелот со аутсајдерот, нешто што според Руди Гарсија е добра шанса за тимот да се врати на победничките патеки после ремито во дербито со Милан.

Италијанскиот првак се врати од два гола негатива и покажа далеку подобри перформанси во вториот дел, а Гарсија на крајот доби и пофалби бидејќи беше доста храбар и направи три измени на полувреме.

Францускиот стручњак ја промени формацијата од 4-3-3 се префрли на 4-2-3-1, но еден од оние кои беа повлечени по 45 минути игра беше и Елиф Елмас.

Македонецот го напушти теренот заедно со Марио Руи и Рахмани, но Гарсија вели дека тоа не значело прозивка за тројцата фудбалери, за кои не исклучува опција веќе утре да бидат стартери.

– Замена во 45-та минута не е казна за фудбалерите. Тоа се прави за доброто на тимот и играчите го знаат тоа. Има многу други случаи кога сум извадил играч на полувреме, а потоа повторно бил стартер на следниот меч.

– Можев да најдам и други решенија, но при 0:2, морав да барам што е најдобро за промена на системот. Мечот покажа дека донесовме добри одлуки, смената на формацијата исто така беше во корист на играчите кои влегоа на терен, – изјави Гарсија.