Вардар во финишот го скрши отпорот на одличниот Охрид

Екипата на Вардар дојде до неочекувано тешка победа против тимот на Охрид во првиот натпревар од плеј-офот од ракометната Суперлига.

„Црвено црните“ во „Јане Сандански“ со 28:26 го совладаа тимот предводен од Раде Стојановиќ кој речиси цели 60 минути беше рамноправен противник со големиот фаворит.

Охриѓани дури и имаа предност од еден гол на полувремето кое го добија со 13:12, но истата не можеа да ја задржат и во вториот дел во кој потклекнаа и на крај мораа да му честитаат на фаворизираниот противник.

Давид Дејвис, очекувано, на оваа средба шанса им даде и на играчите кои немаат голема минутажа во Лигата на шампионите и СЕХА лигата, а своето деби за клубот го имаше и Костадин Петров кој дојде како позајмен ракометар од тимот на Металург.

Филип Николов од Охрид потврди дека игра во одлична форма оваа сезона и со осум погодоци беше најефикасен на паркетот, додека по шест постигнаа Жереми Тото и Тимур Дибиров од Вардар.