Македонските одбојкари за малку испуштија втора победа над Хрватска

Македонската машка одбојкарска репрезентација се бореше жестоко на гостувањето кај Хрватска, но доживеа пораз (3:2) во натпревар од петтото коло на Златната лига.

Дуелот во Задар донесе два пресврта, а на крајот се радуваа домаќините, кои имаа негатива од 0:1 во сетови, но на крајот беа поуспешни во решавачкиот петти сет за конечен триумф и се реваншираа за поразот со ист резултат во Скопје.

По одличниот прв сет за избраниците на Јошко Миленкоски, кои оваа фаза ја добија со 20:25, Хрватите направија пресврт добивајќи ги двата следни сета со 25:17 и 25:23.

Македонија израмни по убедливите 15:25 во четвртиот сет, за решавачкиот тај-брејк сет да им припадне на домаќините со 15:13.

Нашата одбојкарска репрезентација по пет рунди има две победи и три порази, што е доволно за делба на второто место во групата, а во последната рунда се среќаваме со убедливо првата Украина.