Еурофарм Пелистер ги доби првите 30 минути во Сегед, па целосно се распадна и претрпе нов пораз

Еурофарм Пелистер не мрдна од „нула“ и продолжи да реди порази во Лигата на шампионите, па така вечерва пристигна и седмиот неуспех на седмиот натпревар во најелитното натпреварување.

Македонскиот првак и натаму останува без освоен бод и ќе чека нова шанса за кршење на црната серија, без оглед на тоа што одново покажа добра игра во одреден период, пред целосно да се распадне во второто полувреме.

Пелистер и тоа како парираше на Пик Сегед во првите 30 минути и дури ги доби истите со 19:18, но откако Пик Сегед првпат поведе во 37-та минута со 22:21, следеше колапсот во играта на битолскио тим.

Домаќините врзаа одлична серија и поведоа со 27:21, а тоа беше почетокот на крајот за Пелистер кој на крајот загуби со 34:26 и мораше да се помири со нов пораз во Европа.

Васиљев беше најдобар поединец со пет постигнати гола, по четири запишаа Радивојевиќ и Атанасијевиќ, а еден помалку постигна македонскиот репрезентативец и капитен на тимот, Жарко Пешевски.