Страшната бура предизвикала голема опасност, Александер-Арнолд избегнал трагедија

Трент Александер-Арнолд имал многу среќа во текот на вчерашниот ден и според англиските медиуми, избегнал голема трагедија додека управувал со својот автомобил во областа Чешир.

Ѕвездата на Ливерпул можела да настрада, возејќи за време на жестоката бура „Бабет“, која предизвика големи проблеми на островот, при што Трент за малку избегнал паднат столб од мрежата за пренос на електрична енергија.

Столбот кој тежел најмалку половина тон паднал на патот, но Александер-Арнолд успеал да го избегне, иако поради тоа имал контакт со друг автомобил, чиј возач исто така минал неповреден.

Медиумите велат дека е вистинско чудо што никој не бил повреден во инцидентот, имајќи ја предвид тежината и опасноста која ја носел столбот, па и целата ситуација која настанала поради неговото избегнување.

Фудбалерот на Ливерпул според очевидците бил шокиран од она што се случило, а на крајот ќе треба да се погрижи само за материјалната штета, односно поправката на луксузниот Рејнџ Ровер.