Ѓорческа со два различни сета до четвртфинале на турнирот во Грција

Лина Ѓорческа одигра два различна сета против шпанската ривалка Андреа Лазаро Гарсија, но на крајот заслужено си избори место во четвртфиналето на вториот турнир во Ираклион.

Македонската тенисерка доби поголем отпор од својата врсничка во првиот сет, во кој Лазаро Гарсија врати еден брејк, но Ѓорческа направи уште еден и го круниса со гејм на свој сервис за конечни 7:5.

Во продолжението беше многу полесно за Лина, нашата претставничка не загуби ниту еден гејм и со убедливи 6:0 ја заокружи победата од 2:0 во сетови.

Со истата, Ѓорческа се пласираше во четвртфиналето, каде ќе се сретне со Романката Кристина Дину.

Она што оди во корист на најдобрата македонска тенисерка е што Дину денеска одигра меч кој траеше речиси четири часа, а дополнително ќе игра и дубл во вториот дел од денешната програма.