Вечното дерби одложено по втор пат: Нема услови за игра во Битола

Вечното македонско дерби меѓу Пелистер и Вардар во Купот доби второ одложување, овојпат поради немање оптимални услови за игра на теренот во Битола.

Како и сите останатите четвртфиналните натпревари, оној меѓу Пелистер и Вардар првично беше одложен поради големата автобуска трагедија во Бугарија, но истиот нема да се одигра и денеска во истиот термин како останатите три.

Денеска ќе се игра фудбал на средбите меѓу Македонија-Шкупи, Шкендија-Струга и Силекс-Брегалница, додека последниот патник во полуфиналето ќе биде познат подоцна во месец декември.

– Предвидениот натпревар од 1/4 на купот на Македонија против Пелистер во Битола поради лошиот терен и немањето услови за игра, нема да се одигра денес. Новиот термин ќе биде дополнително објавен, – гласи објавата на Вардар.

Снежната покривка во Битола ги направи работите навистина комплицирани за луѓето одговорни за теренот, па непосредно пред стартот на мечот во 13:00 часот, пристигна официјална информација дека истиот нема да се одигра.