Потресените Ѕаниоло и Тонали дале исказ пред полицијата, медиумите ги пренесоа нивните зборови

Николо Ѕаниоло и Сандро Тонали беа отстранети од италијанската фудаблска репрезентација во текот на вчерашниот ден, а причина за тоа е новиот скандал кој изби на Апенините поврзан со обложување на познати фудбалери.

Николо Фаџоли веќе ја призна вината и обложувањето на фудбалски натпревари може да му донесе тригодишна суспензија во Италија, но вчера многу повеќе прашина се крена околу случаите на италијанските репрезентативци.

Ѕаниоло и Тонали биле испрашувани од полицијата уште во тренинг комплексот на „аѕурите“ и со солзи во очите го напуштиле истиот, а сега италијанските медиуми откриваат дека нивните телефони биле задржани во станица.

„Газета дело Спорт“ и „Ла Република“ информираат дека и двајцата признале дека се обложувале на нелегални интернет платформи, но се оправдале дека во ниту еден момент не се обложувале на фудбалски натпревари.

Фудбалерите на Астон Вила и Њукасл на сослушувањето истакнале дека се обложувале само на покер и „блекџек“, па доколку тоа биде докажано во истрагата, нивната казна се очекува да биде доста помала.