Никола Бошковски со фантастичен триумф до првиот пехар

Членот на младинскиот тим на ШК Алкалоид, Никола Бошковски, го освои првото место на овогодинешното издание од традиционалниот младински шаховски турнир „Наум Наумовски – Борче“, при што извојува седум победи во седум партии.

Бошковски кој има 15 години и беше петти носител на турнирот за младинци до 18 години, според стартниот рејтинг (1381),  иако по тој параметар беше послаб за повеќе од 200 поени од прворангираните, а воедно и помлад од дел од нив, успеа да стигне до првото место без изгубен поен. Со тоа тој го подобри сопствениот рејтинг за 68 бода.

Традиционалниот турнир кој се организира по повод патронатот на основното училиште „Наум Наумовски – Борче“ е еден од најмасовните организиран во Македонија, а оваа година имаше гости од Албанија, Грција и Турција.

Во највисоката категорија имаше 56 учесници, а дополнително, во категориите за помлади учесници се одржаа уште два придружни турнира, за деца до 10 години и за деца до 8 години. На првиот победи Ерди Кани од Албанија, а на вториот Матеј Диванисов, при што на двата турнира имаше по 20 играчи.