„Мирор“ предизвика контроверзи со насловната страна: Фала богу што не игравме против цела Македонија

Англиските медиуми очекувано одвоија многу простор за случувањата на фудбалскиот натпревар меѓу Македонија и Англија од квалификациите за ЕП 2024, а самиот тек на настаните во Скопје овозможи и различни коментари и дебати.

Англиските фанови не се задоволни со ремито, но сепак составот на Герет Саутгејт и со бод го задржа првото место во квалификациската група, во која заслужено стигна до директен пласман на ЕП.

Меѓу различните коментари и насловни страни на медиумите се издвои таа на тиражниот таблоид „Мирор“, кој реши да го одбележи натпреварот со контроверзен наслов, погоден за отворање бесконечни дебати.

– Фала богу што не игравме против цела Македонија, – стои преку цела страна на „Мирор“, медиум кој алудира на името Северна Македонија, а тоа не остана неприметено и кај другите медиуми.

– Претпоставуваме дека се работи за шега, отколку за непознавање на европската географија, – напиша „Би-Би-Си“ во коментарот за оваа насловна страна.