Хувентуд стопи негатива од 23 поени, но доживеа елиминација од Виртус

Шпански Хувентуд се врати од негатива од 23 поени во третиот период, но повторно не се снајде најдобро во завршницата на дуелот со Виртус Болоња од четвртфиналето на Еврокупот (78:84).

Италијанскиот состав го задржа својот перфектен скор сезонава и со втората победа во серијата со Хувентуд, се пласираше во полуфиналето на ова европско натпреварување.

Гостите започнаа подобро, по првиот перио водеа со 14:19, а на полувреме со 31:43, за во третиот период да стигнат до плус 23, односно предност 32:55.

Ненад Димитријевиќ и неговите соиграчи не се предадоа, па иако нашиот репрезентативец остана на клупата откако се пожали на повреда на коленото, Басас ги предводеше домаќините со серија тројки, со кои најпрвин стигна на 69:69, а потоа и поведа со 72:71 на три минути до крајот.

Но, следуваше подобар финиш на Виртус, кој предводен од Хантер и Теодосиќ го издржа налетот на Каталонците и со вториот триумф, го завери пласманот во следната рунда.

За 13 минути на теренот, Димитријевиќ реализираше 7 поени, 3 скокови и 1 асистенција, а најефикасен беше Басас со 26 поени. Хантер и Вимс со 18 и Теодосиќ со 17 поени пак беа предводници на тимот чиј тренер е Александар Ѓорѓевиќ и кој сега ќе го чека противникот во полуфиналето.