Ѓоковиќ има неостварена желба кога е во прашање Надал: Се надевам дека по крајот на кариерите…..

Новак Ѓоковиќ вчера беше дел од свечената церемонија која ја организираше „Франс Фудбал“ и ја додели наградата на најдобрата светска фудбалерка, но пред да замине на гала-вечерта по повод „Златната топка“, светскиот рекет број еден одработил и краток разговор со луѓето од „Франс 5“.

Ноле во текот на оваа недела ќе игра на Мастерсот во Париз и ќе има тениски предизвици во француската престолнина, па едно од прашањата кои му биле поставени се однесувале за неговиот најголем ривал во кариерата.

Ѓоковиќ во повеќе наврати има посочено дека Надал е негов најтежок противник во кариерата, па иако Шпанецот неодамна му намени и неколку зајадливи изјави, Ноле верува дека тие ќе можат мирно да испијат пијачка на плажа по крајот на кариерите.

Србинот вели дека тој и Надал не се пријатели, но цврсто е убеден дека ќе можат да седнат заедно на маса и да се релаксираат во разговор за нивните животи.

– Надал е специјален играч за мојата кариера и тоа сум го повторил повеќепати. Ние не сме пријатели, но имаме голема почит еден кон друг. Се надевам дека по крајот на кариерите ќе седнеме заедно на плажа, ќе пиеме пијачки и ќе можеме да зборуваме за животот, – изјави Ѓоковиќ.