Еурофарм Пелистер ослободи уште еден дански ракометар (Фото)

Вчерашното збогување со Андреас Јохан Нилсен беше прва најава за неколку разделби кои ќе следат во Еурофарм Пелистер во овој зимски преоден рок, а потврда за тоа добивме и ова попладне.

Македонскиот првак се поздрави со уште еден дански интернационален, со тоа што мора да се признае дека Каспер Кисум прикажа далеку подобри перформанси и беше еден од водечките во шампионскиот поход минатата сезона.

Според соопштението кое го проследија битолчани во јавноста, Кисум веќе си има договорено ангажман со друг клуб, па оттаму и одлуката за предвремен раскина на договорот на средина на сезоната.

– РК Еурофарм Пелистер и данскиот интернационалец Каспер Кисум постигнаа спогодба за раскин на соработката. Во новата 2024 година еден од хероите од сезоната 2022/23 ќе настапува за друг клуб. 31-годишниот лев и среден бек остави силна трага во дресот на нашиот клуб и има големи заслуги за освојувањето на титулата минатата сезона.

– Кисум во првиот дел од сезоната постигна 12 голови во Лигата на шампионите, а редовно го носеше зелено-белиот дрес и во Суперлигата. Со неговата професионалност и неспорен квалитет клубот доби големи придобивки во неговиот едногодишен престој во Битола и вратите од нашиот клуб секогаш ќе бидат отворени за Каспер Кисум. РК Еурофарм Пелистер му посакува приватни и професионални успеси на Каспер Кисум.