Трет неуспех на ЕП: Јуниорите претрпеа тежок пораз од Исланд за крај на групната фаза

По вчерашниот „скршен мраз“ и победа над Норвешка, македонската јуниорска репрезентација претрпе нов пораз на Европското првенство од Б дивизијата кое се игра во Португалија, а истиот беше и најубедлив на шампионатот.

Селекцијата на Исланд ни нанесе тежок пораз од 33 поени разлика и загубивме поради катастрофалното второ полувреме, во кое постигнавме само 27 поени во третата и четвртата четвртина.

На крајот залуден испадна фактот што влеговме како благи фаворити во оваа завршна пресметка во групната фаза, која на крајот ја завршивме како четвртопласирани од пет репрезентации.

По првите 20 минути, навистина не изгледаше дека Македонија така лесно ќе го загуби овој меч (32:36), но деветте поени во третиот период беа најава за тешкиот пораз од 59:92.

Ова сепак не значи крај на турнирот за избраниците на селекторот Лечиќ, бидејќи сега ќе следи разигрување за пласман од 9-то до 16-то место.