Тренерот на Звезда за ниската провокација од Калиниќ: Му се извинувам на Партизан (Видео)

Големото дерби меѓу Црвена Звезда и Партизан во мајсторката за трофеј во АБА лигата донесе се што можеше да се очекува, односно понуди вообичаена тензија, многу провокации, прекини од судиите и празнење на салата.

Она што стана тренд кај нашиот сосед продолжи и во последниот меч од финалната серија во регионалното натпреварување, па вистинска штета е што по една таква изедначена пресметка, повеќе се зборува за инциденти и провокации, отколку за кошарка.

Разочараниот Жељко Обрадовиќ одби да зборува за кошарка пред српските новинари по поразот од 80:77, додека Дејан Радоњиќ беше приморан да му се извинува на колегата, но и на Партизан како колектив.

Причина за тоа беше некоректниот потег на Никола Калиниќ, кој по звукот на сирената, се упати кон клупата на Партизан и славеше пред нив, или поточно му возврати на Трифуновиќ кој направи нешто слично на претходниот меч.

– Имаше многу полемики во оваа финална серија, но јас не сакам да зборувам за тоа. За жал, многу малку се зборува за кошарка, а мислам дека се играше навистина добро. Морам да испратам извинување за однесувањето на Никола Калиниќ кон клупата на Партизан. Тешко е да се зборува после ваква серија, но горд сум на тоа што го одбранивме тронот и што повторно се пласиравме во Евролигата, – изјави тренерот на Звезда.