Претседателот на „росонерите“: Милан ќе има најубав стадион во светот

Милан го започна проектот за изградба на нов, сопствен стадион, а претседателот Паоло Скарони е убеден дека тоа ќе биде важен фудбалски храм по примерот на актуелниот „Сан Сиро“.

Милан реши да гради сопствен стадион во областа Сан Донато, а првичната проекција е дека отворањето може да се случи во 2028 година.

– Стадионот на Милан ќе биде најубав во светот. Зборувам за нов стадион пет години, а сега тоа ни стана мисија.

– Капацитетот ќе биде околу 70.000 гледачи, нашиот просек изминативе години. Стадионот ќе биде достапен и во деновите кога ќе нема натпревари, за други придружни активности. Доцниме 20 години зад она што е направено во други земји, верувам дека првата сезона во која ќе играме на нов стадион ќе биде во 2028 година, – вели Скарони.

Новиот дом на Милан ќе содржи и продавници, ресторани и други комерцијални активности, што ќе донесе и дополнителни приходи.