Пик Сегед вторпат го победи Вардар, петти пораз во серија за македонскиот претставник во ЛШ

Вардар вторпат во една недела загуби од Пик Сегед во ракометната Лига на шампиони, а вечерва беше немоќен против унгарскиот ривал на домашен терен (27:30).

Избраниците на Веселин Вујовиќ уште во првото полувреме имаа седум гола негатива и се мачеа да постигнат гол, посебно во почетните 15 минути, па Пик Сегед замина на пауза со резултат 9:16.

Вардар немаше сили за пресврт во второто полувреме и успеа само да ја намали негативата, стигнувајќи до петтиот пораз во серија со резултат 27:30.

Дибиров и Гаџа со по 5 гола беа најефикасни во редовите на „црвено-црните“, додека во победничкиот тим, Шоштариќ стигна до 7 погодоци, додека Бомбач и Бодо реализираа по 5 пати.

Со денешниот неуспех, Вардар е на шестото место во својата група со само пет освоени бодови и со подобар пласман само од ППД Загреб и Мешков Брест.