Баерн загуби еден фудбалер во пресрет на реваншот со Арсенал

Баерн Минхен оствари рутинска победа над Келн за колку толку да го поправи впечатокот за своите настапи во Бундеслигата, но фокусот на целата екипа очекувано и натаму е кон Лигата на шампионите.

Баварците во среда го пречекуваат Арсенал со императив да обезбедат полуфинале во европското натпреварување, а најновите информации се дека тренерот Томас Тухел нема да смета на еден фудбалер.

Кингсли Коман заработил повреда на адукторот на вчерашниот дуел со Келн и го очекува одредена пауза пред да може да им помогне на соиграчите.

Французинот ќе отсуствува неколку недели, колку што му се потребни за рехабилитација, а тоа значи дека Тухел ќе има една опција помалку во сигурно сериозниот предизвик на „Алијанц“.

– Кингсли Коман ќе биде надвор од терените неколку недели откако заработи повреда на дуелот со Келн во Бундеслигата, – стои во соопштението на Баерн, а прашање е дали Коман ќе може да одигра уште некој натпревар сезонава во дресот на германскиот тим.