Одбојкарите брзо го завршија настапот на Медитеранските игри

Најсилната машка одбојкарска селекција не е во најдобра форма, па по крајот на настапите во Сребрената лига, брзо го заврши своето учество на Медитеранските игри.

Одбојкарската репрезентација во машка конкуренција е една од селекциите кои ги испративме во Оран, но настапот во оваа конкуренција го завршуваме по само два меча.

По поразот од Египет, денеска следеше уште еден неуспех, кој секако беше и очекуван ако се знае каков противник имавме од спротивната страна на мрежата.

Италијанците ја оправдаа фавористската улога и славеа со убедливи 3:0, со тоа што нашите „спартанци“ најсилниот отпор го дадоа во третиот сет.

Првите два ги загубивме со 25:19 и 25:16, додека во последниот стигнавме до 23 поени и мечот заврши со конечни 25:23.