Најава за кошаркарска „бомба“: Звезда со богата понуда го „лови“ Миротиќ

Никола Миротиќ треба да постигне договор со Барселона за прекин на соработката, но повеќе од јасно е дека тоа ќе се случи или само прашање е на време кога ќе се затвори овој дел од приказната.

Во меѓувреме доста се шпекулира околу иднината на Црногорецот со шпански пасош, а најновата вест е дека Црвена Звезда води во трката за неговиот потпис.

Грчки „СДНА“ тврди дека сега Звезда е во пол позиција за Миротиќ затоа што нуди три милиони евра по сезона. Со оваа понуда „црвено-белите“ избиваат пред Олимпијакос, тим кој во Никола гледа адекватна замена за Саша Везенков кој премина во Сакраменто Кингс.

Познато е дека Миротиќ е во добри, пријателски односи со Звезда што е уште еден адут кој оди на страната на српскиот шампион. Ако крилниот центар каже „ДА“, поточно ја прифати понудата ќе стане најплатен играч на овие простори дури и ќе го надмине капитенот на Партизан, Кевин Пантер кој заработува преку два милиони евра годишно.

Црногорецот претходно има играно за Реал Мадрид и неколку клубови во НБА лигата како Чикаго Булс, Њу Орлеанс Пеликанс и Милвоки Бакс.