Кадетите ја испотија фаворизираната Норвешка, но отворија со пораз на СП во Хрватска

Македонската кадетска репрезентација до 19 години денеска го започна својот настап на Светското првенство во Хрватска, турнир на кој на самиот старт покажаа дека можат да се носат и со една силна селекција каква што е Норвешка.

Избраниците на Радослав Стојановиќ се држеа во дуелот со фаворизираните скандинавци и се покажаа во навистина добро светло, но сепак немаа сили за големо изненадување и сензација на отворањето на кадетскиот мундијал.

Норвежаните отворија подобро во и имаа почетна позитива од 3:1, Македонија успеа да одговори и влезе во егал ситуација, но фаворитот се одлепи на плус четири и добра вест беше што нашите надежи намали на минус два на полувреме.

На пауза се замина со резултат 11:9 во едно полувреме во кое се играше доста цврст ракомет, а се чини дека стартот на вториот дел го реши прашањето околу победникот.

Норвешка се одлепи на плус шест и ова беше највисока предност за скандинавците, но не и дефинитивна бидејќи Македонија покажа карактер и се врати со серија од 4:0. Вистинска драма беше во самиот финиш кога нашите момчиња дојдоа на само минус еден, но сепак не издржаа докрај и загубија со 27:25.

Мирче Калајџиевски со седум гола беше најефикасен во нашиот тим, додека Олсет од Норвешка беше незадржлив за нашата одбрана и постигна девет гола.